Les denne teksten på norsk her!
Ij leah aelhkie buerkiestidh guktie Fovsen njaarkeste båetedh.
NSRn rïjhketjåanghkoe. Sïjhtem aelhkedh dikteste lohkedh maam Pål Doj tjaaleme gellie luhkie jaepieh juassah:
“Vïelle staate. Datne stoerre veaksehke. Manne onne viesjies. Dov jïjnjh viehkiehtæjjah. Mov barre bïegke” Numhtie dïhte tjeeli, jïh numhtie ussjedi. Bïegke edtja mijjem viehkiehtieh. Daelie domtoe bïegke mijjem vuastele.
Bïegkefaamoevierhtieh tseegkesovveme mov jïh mijjen gåatomedajvesne Fovsen njaarkesne.
Guhkiem barkeme, tjarke vuastalamme, geerve, guhkies biejjieh orreme. Jïjnjem dååjrehtamme, mejtie sïjhteme slyöhpedh. Bööremem åadtjome beapmoem jurjiehtidh vierhtien rïhpesimmesne. Staate viehkiem orreme mijjen vööste Jollemes reakta-aamhtesisnie. Govleme seabradahken stuerebe aarvoe dejnie, enn båatsojne.
Im annje doesth ussjedidh guktie daate aamhtese mijjem tsavtsa, daelie jïh båetijen aejkien. Gaatesjen, vïenhtem stuerebe konsekvensh utnieh enn doestem ussjedidh jïh guarkedh. Man jïjnje edtjebe tööledh?
Annje vuertieminie buerebe sjïdtedh. Staate lea mijjese aaj, vuj?
Ibie dåarjoem reerenasseste åadtjoeh. Dah jiehtieh edtjieh gaavnedh guktie båatsoe jïh bïegkefaamoe maehtieh ektine veasodh. Mijjieh daejrebe, dotkeme aaj, ij gåaredh. Dle gihtjem, gusnie Nöörjen åålmehrïekteles dïedte? Edtja reerenasse barre aalkoealmetji reaktah hajkedh?
Daate alvas aamhtese, ij goh barre mijjide, men gaajhkesidie. Dan åvteste tuhtjem hijven daate aamhtese bæjjese lutnjesovveme. Vihkeles rïjhketjåanghkoe tjïelke dejnie aamhtesinie jïh jåarhka barkedh båetije aejkien åvteste guktie eah jienebh daarpesjh daam jååhkesjidh.
Manne sïjhtem åvtese vuejnedh, jïh mov lea håhkoe buerebe sjædta. Tjoerebe håhkoem utnedh, jïh jåerhkedh barkedh saemiej reaktaj åvteste. Jis ibie mijjieh daam darjobe, gie dellie?
Mijjieh, NSR, jåarhkebe. Mujhtebe gubpede båetebe. Ektine tjåadtjobe jïh sinsitniem dåarjobe. Sïemesvoete, nænnoesvoete.
Manne funterdem guktie sjïdteme jis daam dåapmoem åadtjeme åvtelen bigkesovvi? Dle vïenhtem ij maam sjïdteme. Dan åvteste dan soe vihkeles ij åadtjoeh bigkedh åvtelen “gyldigheten av tillatelse” rïekteles tjilkeme.
Gæjhtoe.
Numhtie Maja Kristine Jåma håaloeji Nöörjen saemiej rïjhkesiebrien 47. rïjhketjåanghkose (NSR) skïereden 24. b. – 25. b. Dïhte lij Noerhte-Trööndelaagen saemien siebrien saadthalmetje.